இன்ஜி., கவுன்சிலிங்கில் இதுவரை 45 ஆயிரம், 'சீட்'கள் நிரம்பின

இன்ஜினியரிங் கவுன்சிலிங்கில், மூன்றாம் சுற்று நிறைவில், 45 ஆயிரம் இடங்கள் நிரம்பியுள்ளன.
இன்ஜினியரிங் கல்லுாரிகளுக்கான, தமிழக அரசின் கவுன்சிலிங்கில், இறுதி சுற்றான, நான்காம் சுற்றில் பங்கேற்க, 37 ஆயிரத்து, 598 பேர், தரவரிசையில் இடம் பெற்றுள்ளனர். இவர்களில், 34 ஆயிரம் பேர், இடங்களை தேர்வு செய்யலாம் என, எதிர்பார்க்கப்படுகிறது.இதற்கிடையில், மூன்றாவது சுற்றில், 24 ஆயிரம் இடங்கள் நிரம்பியுள்ளன. இதற்கான பட்டியல், நேற்று அறிவிக்கப்பட்டது.மொத்தம் உள்ள, 1.72 லட்சம் இடங்களுக்கு, மூன்று சுற்று நடந்து முடிந்த, கவுன்சிலிங் வழியாக, இதுவரை, 45 ஆயிரத்து, 662 இடங்கள் நிரம்பியுள்ளன. அதாவது, 26 சதவீத இடங்கள் நிரம்பி, 74 சதவீத இடங்கள் காலியாக உள்ளன.இதுவரையிலான, மூன்று சுற்று கவுன்சிலிங்கிலும், 35 கல்லுாரிகளில், ஓர் இடம் கூட நிரம்பவில்லை. 115 கல்லுாரிகளில், ஐந்து சதவீதத்துக்கும் குறைவான இடங்களே நிரம்பியுள்ளன. 23 கல்லுாரிகளில், 60 முதல், 79 சதவீத இடங்கள் நிரம்பியுள்ளன. 12 கல்லுாரிகளில், 89 சதவீதமும், 10 கல்லுாரிகளில், 98 சதவீதமும் இடங்கள் நிரம்பியுள்ளன.அண்ணா பல்கலையின், கிண்டி இன்ஜினியரிங் கல்லுாரி, சேலத்தில் உள்ள மத்திய அரசின், கைத்தறி தொழில்நுட்ப கல்லுாரி, காரைக்குடியில் உள்ள, மத்திய, 'எலக்ட்ரோ கெமிக்கல்' ஆராய்ச்சி நிறுவன கல்லுாரி ஆகியவற்றில், அனைத்து இடங்களும் நிரம்பி விட்டன.