அடக்கு முறை, எச்சரிக்கையால் நசுக்கிவிட முடியாது ‘போராட்டம் தீவிரம் அடையும்’ ஜாக்டோ-ஜியோ அறிவிப்பு

அடக்கு முறை, எச்சரிக்கையால் போராட்டத்தை நசுக்கிவிடமுடியாது என்றும், நாளுக்கு, நாள் தீவிரம் அடையும் என்றும் ஜாக்டோ-ஜியோ அறிவித்துள்ளது.ஜாக்டோ-ஜியோ மாநில ஒருங்கிணைப்பாளர்கள் கூட்டாக வெளியிட்டுள்ள அறிக்கையில் கூறியிருப்பதாவது:-

ஜாக்டோ-ஜியோ போராட்டம் நாளுக்கு, நாள் தீவிரம் அடைந்து வருகிறது. இந்தநிலையில் அரசு தரப்பில் அடக்குமுறைகள் ஏவப்படுவதும், புளுகுமூட்டைகள் அவிழ்த்துவிடப்படுவதும் அதிகரித்து வருகின்றன. மக்கள் மத்தியில் ஆசிரியர்கள், அரசு ஊழியர்கள்-பணியாளர்கள் மீது களங்கம் ஏற்படுத்தும் வகையில் அரசும், அமைச்சர்களும் அறிக்கைகள் விட்ட வண்ணம் உள்ளனர். அமைச்சர் செங்கோட்டையன் தற்காலிக ஆசிரியர்களை ரூ.7,500 சம்பளத்தில் 28-ந்தேதி (இன்று) முதல் நியமிக்க நடவடிக்கை எடுக்கப்படும் என்று போராட்டத்தில் ஈடுபடும் ஆசிரியர்களை பயமுறுத்த அறிக்கை விட்டார்.

ரூ.7,500-க்கு ஆசிரியர்கள் கிடைக்காத நிலையில் அதை இப்போது ரூ.10 ஆயிரம் கொடுப்பதாக அறிவித்துள்ளார். ரூ.20 ஆயிரம் சம்பளம் கொடுத்து தற்காலிக ஆசிரியர்களை நியமித்தாலும், அவர்களால் மாணவர்களுக்கு தேர்வுகள் நெருங்கிவரும் நிலையில் தக்க முறையில் பாடங்களை போதிக்க முடியாது என்பதை மாணவர்களும், பெற்றோரும் அறிவார்கள். ஆனால் அரசோ ஜாக்டோ-ஜியோ நிர்வாகிகளை நேரடியாக அழைத்துப் பேசுவதை கவுரவ பிரச்சினையாக கருதுகிறது.

நிதி நிலைமை

அரசு பள்ளி மாணவர்களின் கல்வி பாதிக்கப்படுகிறது என்று ஐகோர்ட்டில் வழக்கு போட்டு, போராட்டத்துக்கு தடை வாங்குகிறதே தவிர, 3 வருடங்களாக போராடுகின்ற ஆசிரியர்கள், அரசு ஊழியர்கள்-பணியாளர்களை நேரடியாக அழைத்துப் பேசி பிரச்சினைகளை தீர்க்க நினைக்கவில்லை. அரசின் நிதிநிலை மோசமாக உள்ளது போராட்டம் நடத்த வேண்டாம் என்று கோரும் இந்த அரசு தான், நாங்கள் போராடாமல் எங்கள் கோரிக்கைகளை பரிசீலியுங்கள் என்று பல முறை கெஞ்சிய போது அதைப்பற்றி சிறிதும் கருத்தில் கொள்ளாமல் எம்.எல்.ஏ.க்களுக்கு மட்டும் 110 சதவீத உயர்வு அளித்து அரசாணை வெளியிட்டது. அப்போது மட்டும் அரசின் நிதி நிலைமை செழிப்பாக இருந்ததா?

ஊழியர்களின் நியாயமான கோரிக்கைகளை வெளிப்படைத் தன்மையுடன் பரிசீலித்து, அவர்களின் கோரிக்கைகளை மொத்தமாக இல்லாவிட்டாலும் கூடுமான அளவு நிறைவேற்றவேண்டும் என்று விரும்புகிறோம். அப்போதுதான் அரசு நிர்வாகமும், மக்கள் திட்டப்பணிகளும் தொய்வின்றி நடக்கும், சமூகத்தில் நலமும், வளமும் செழிக்கும். தற்காலிக ஆசிரியர்களை நியமிப்பதாலோ, போராட்டக்காரர்களை கைது செய்து சிறையில் அடைப்பதாலோ, அவர்கள் மீது துறைரீதியான நடவடிக்கைகள் எடுப்பதாலோ, பொய்யான அறிக்கை விடுவதாலோ கொழுந்துவிட்டு எரியும் ஜாக்டோ-ஜியோ போராட்டத்தை ஒடுக்கிவிடலாம் என்று இந்த அரசு நினைத்தால் அது சிறுபிள்ளைத்தனமான செயலாகும்.

நசுக்கிவிடமுடியாது

அறிக்கைகள், புள்ளி விவரங்கள், மாற்று ஏற்பாடுகள், அடக்கு முறைகள், எச்சரிக்கைகளாலும் போராட்டத்தை நசுக்கிவிடமுடியாது. இனியாவது இதனை உணர்ந்து ஜாக்டோ-ஜியோ ஒருங்கிணைப்பாளர்களை உடனடியாக அழைத்து பேச்சுவார்த்தை நடத்தி, கோரிக்கைகளை நிறைவேற்றி பொதுமக்களுக்கும், மாணவர்களுக்கும் ஏற்பட்டுள்ள இடர்பாடுகளை உடனடியாக களைய முதல்-அமைச்சர் எடப்பாடி பழனிசாமி முன்வரவேண்டும்.

இவ்வாறு அதில் கூறப்பட்டுள்ளது.

மறியல்

இதற்கிடையே ஜாக்டோ-ஜியோ மாநில ஒருங்கிணைப்பாளர்கள் அன்பரசு, தியாகராஜன் ஆகியோர் சென்னையில் நேற்று கூட்டாக நிருபர்களுக்கு அளித்த பேட்டியில் கூறியதாவது:-

எங்களுடைய போராட்டம் தமிழகம் முழுவதும் நாளுக்கு, நாள் மிகவும் எழுச்சிக்கரமாக நடந்து வருகிறது. ஜாக்டோ-ஜியோ நிர்வாகிகளை அழைத்துப் பேசி, கோரிக்கைகளை நிறைவேற்றுவதற்கு அரசு முன்வரவேண்டும். நாளை (இன்று) மாவட்ட தலைநகரங்களில் சாலை மறியல் போராட்டத்தில் ஈடுபட உள்ளோம். ஜாக்டோ-ஜியோ போராட்டம் தொடர்பான வழக்கு சென்னை ஐகோர்ட்டு மதுரை கிளையில் நாளை விசாரணைக்கு வர இருக்கிறது.

இந்த வழக்கில் கோர்ட்டு விதிக்கும் உத்தரவின் அடிப்படையில், என்ன நிலைப்பாடு எடுக்கலாம்? என்பது குறித்து நிர்வாகிகள், மதுரையில் கலந்து ஆலோசிக்க உள்ளோம். அதன் பின்னர் அடுத்தகட்ட நடவடிக்கை குறித்து அறிவிக்கப்படும். எங்களை அழைத்துப் பேசி, கோரிக்கைகளை நிறைவேற்றுவதற்கு அரசு முன்வரவேண்டும். இவ்வாறு செய்தால் மட்டுமே போராட்டத்தை கைவிட்டு, பணிக்கு திரும்புவோம். இல்லையென்றால் போராட்டத்தை தீவிரமான முறையில் தொடருவோம்.

இவ்வாறு அவர்கள் கூறினர்.